Ismet Sinani e ka pritur prej kohësh një ftesë nga Shqipëria, por trajneri Erjon Bogdani nuk e ka përfshirë në planet e tij, ndaj sulmuesi i Milanit ka vendosur t’i japë drejtim dhe të zgjedhë Kosovën.
Lajmi është bërë i ditur në emisionin “Sporti” në “Kohavision TV” dhe kështu i riu sfumon mundësinë për të luajtur me kuqezinjtë. 18-vjeçari këtë sezon po paraqitet mirë, teksa ia ka dalë të gjejë rrugën e rrjetës gjashtë herë. Katër gola ai i ka shënuar në kupë, kurse dy të tjerët në kampionat.
Së fundmi ka pasur edhe një çështje në lidhje me talentet, teksa nga Federata e Futbollit e Kosovës është paralajmëruar se do të shkojnë në FIFA nëse do të vijohet të ftohen lojtarët me origjinë nga Kosova. Gjithsesi deri më tani gjithçka ka qenë në kuadrin e fjalëve dhe mbetet për t’u parë se çfarë do të ndodhë në të ardhmen. Sinani do të veshë fillimisht fanellën e Kosovës U19 dhe do të aktivizohet në miqësoren me Portugalinë./EDS/
