Vazhdojnë hetimet në lidhje me vdekjen e të resë Xhuljeta Gjeka në Fier ku familjarët e saj akuzojnë mjekët. Familjarët e saj enden dyerve të spitalit e policisë për të kërkuar drejtësi për vdekjen e 21-vjeçares.
Ata akuzojnë mjekët për neglizhencë ndaj vajzës së re që humbi jetën me të mbërritur në spital.
“I uroj popullit shqiptar të mos kenë fatin e mbesës time veçanërisht populli i Fierit me ata mjekë që kemi.
E kam çuar çupën në orën 3 në spital pasi u ftoh në trup, nga 37 i shkoi në 35 temperatura e më pas ia matën me termometër që s’punonte, e nxorën 36,5.
“Unë bërtisja: ‘Doktoreshë çupa nuk është mirë, po më ftohet’. Këtu gabuam ne si prindër, e nisën në shtëpi”, thotë gjyshi mes lotësh për “BW”.
Duke akuzuar mjekët, gjyshi thotë: “Si nuk më solli njëri një barelë, bërtisja ‘o maskarenj, çupa më iku në kraharor, në duart e mia, më bëri hatanë. Shëndetësia ma mori në qafë çupën”, thotë gjyshi teksa shpërthen në të qara.
