Kryetari i Komunës së Drenasit, për të dytën herë, e ka mbajtur premtimin e tij për emërimin e grave drejtoresha në qeverisjen komunale.
Ai ishte kryetar i parë i një komune që pozitat e drejtorëve i ka ndarë në mënyrë të barabartë në mes të dy gjinive, në mandatin e shkurt që e nisi në vitin 2016.
Lladrovci ka thënë se do të mbajë standardin e njëjtë, pra që gjysma e drejtorive të udhëhiqen nga gratë.
“Në fushatën për zgjedhjet e jashtëzakonshme të 2016-ës kam premtu emërimin e 3-4 drejtoreshave, ndërsa me të marr mandatin i kam emëruar 5 drejtoresha, pra gjysma e drejtorive udhëhiqen nga gratë. Sigurisht që do të vazhdojë këtë standardë”, ka thënë Lladrovci.
Ai ka premtuar se 12 shkolla do të udhëhiqen nga gratë në mandatin e tij të dytë.
“Në arsim i kam gjetur vetëm 2 drejtoresha në krye të institucioneve arsimore, ndërsa tash i kam bërë 8 e së shpejti do të bëhet 12 drejtoresha në arsim”, ka thënë Lladrovci.
Në fillimin e mandatit të tij të dytë si Kryetar i Drenasit, Lladrovci serish e ka mbajtur premtimin e tij të dhënë në debatin komunal ‘Jeta në Kosovë’ të mbajtur gjatë muajit shtator 2017.
Lladrovci, në debatin për zgjedhjet lokale të vitit 2017, kishte premtuar se do t’i emërojë 5 gra drejtoresha, gjegjësisht gjysmën e drejtorive do ta udhëheqin gratë.
Këtë premtim ai e ka mbajtur. Kjo është konfirmuar nga zëdhënësi i komunës së Drenasit, Bekim Dobra.
“Është kompletuar emërimi i drejtorive dhe 5 prej tyre janë femra, ku gjithsej ka 10 drejtori Komuna e Drenasit”, tha Dobra./Kallxo.com/
