FC Prishtina po i vazhdon përgatitjet për pjesën e dytë të sezonit.
Bardhekaltrit po ushtrojnë në Mazgit nën drejtimin e trajnerit të mirënjohur shqiptar, Mirel Josa.
Ndërkohë, sot ekipi është vizituar nga kryesia e klubit, e cila i ka përcjellë nga afër ushtrimet. Presidenti Remzi Ejupi me bashkëpunëtorët e tij, Afrim Muçiqi, Fatos Hoxha e Fikret Maqastena etj, ishin të pranishëm në stërvitjen e sotme.
Në stërvitje u pa edhe një futbollist që flitet se është brazilian, i cili është në prova.
Klubi edhe pse ka postuar foto të tij nga stërvitja, nuk ka dhënë më shumë informacione.
Pas pak ditësh, kryeqytetasit do të transferohen në Turqi, ku do ta vazhdojnë fazën përgatitore.
Ata synojnë ta fitojnë titullin e kampionit ose Kupën e Kosovës, në mënyrë që të luajnë përsëri në garat evropiane.
