Shkolla fillore “Ismet Rrahmani” në Açarevë të Skenderajt, ka fituar një dhuratë të madhe me plot 200 tituj të librave të rinj, duke pasuruar bibliotekën e shkollës, transmeton portali Drenica Press.
Këtë e bën të ditur regjisori i njohur nga fshati Açareve, Dibran Fylli.
Ndër të tjera thuhet: “Duke i përmbyllur aktivitetet artistike, kulturore e humane të këtij viti, sot më 27 dhjetor 2017, me iniciativën e Z. Agim Tahiraj e të regjisorit Dibran Fylli, Bibliotekës së shkollës fillore “Ismet Rrahmani” në Açarevë të Drenicës iu dhuruan afro 200 tituj libra, dhurim ky nga Z. Sebush Dermaku – Instituti Albanologjik i Kosovës, nga Afrim Hamiti – Biblioteka e Institutit të Historisë dhe veprat letrare të autorit nga Açareva Z. Dibran Fylli.
Këto libra, në emër të dy Instituteve i dorëzuan Z. Agim Tahiraj e Dibran Fylli dhe me dashamirësi i pranuan Drejtori i shkollës Z. Ilaz Azemi e Sekretari Z. Musli Haxha, me ç’rast, në shenj respekti Drejtoria e Shkollës i nderoi me Mirënjohje Z. Agim Tahiraj, Z. Sebush Dermaku, Z. Afrim Hamiti dhe Z. Dibran Fylli.
Açareva, edhe pse vend i largët e i harruar nga kryeqendra e Republikës së Kosovës, është vendi më i afërt e i preferuar i liridashësve, çerdhja e luftëtarëve të lirisë ngase aty për herë të parë në historinë e shqiptarëve u themelua më 22 prill 1998, Akademia Ushtarake e UÇK-së, e ideuar, themeluar e konsoliduar nga strategu i luftërave çlirimtare Gjeneral Bekim Berisha – ABEJA.
