Kryetari i Skenderajt, Bekim Jashari ka reaguar ndaj raportimeve të mediave lidhur me punën e tij si shef i Bordit të Aeroportit Ndërkombëtar të Prishtinës.
Sipas tij, artikulli i publikuar me titullin: “Hetuesit e BE-së: Aeroporti i pasigurt, dyshime për keqpërdorime financiare nga Bekim Jashari”, përmban të pavërteta.
“Ky artikulli i botuar, në mënyrën më të pandershme, implikon emrin e mbiemrin tim si i dyshuar për keqpërdorime. Artikulli përmban një varg të pavërtetash dhe gjysmë të vërteta, të cilat tentojnë të mjegullojnë personalitetin tim nga supozime krejt të paqëndrueshme”, ka thënë Jashari, përmes një shkrimi në Facebook.
Jashari ka thënë se manipulimin financiar duhet ta raportojë dhe ta ndëshkojë ligji dhe jo gazetarët.
“Ka dy vjet që nuk jam pjesë e menaxhmentit në aeroport, e as në çfarëdo cilësie. Emri im i lidhur në çfarëdo manipulimi në cilëndo çështje si ajo e ngritur pranë EULEX-it, që tenton artikulli ta lidh me emrin tim, e hedh poshtë si tendencioz”, ka thënë ai. “Manipulimin financiar duhet ta raportoj, ta hulumtoj dhe ta ndëshkoj ligji, jo media”,
Jashari ka ftuar hetuesit edhe vendor edhe evropian, të sqarojnë raportet e tilla.
Hetuesit e Zyrës së Bashkimit Evropian për Inteligjencë Kriminale kanë bërë një raport të veçantë për Aeroportin e Prishtinës, ku thuhet se thyerja e protokolleve të sigurisë me prishje radarësh e mungesë gjeneratorësh janë vetëm një anë e problemeve, derisa ngrenë dyshime për keqpërdorime financiare në projekte milionëshe.
Ata kanë ngritur dyshime se Bahri Nurdini dhe Bekim Jashari, tash kryetar i Skenderajt e që dikur shërbeu si kryetar i bordit i Autoritetit të Aviacionit Civil të Kosovës, kanë ngritur një firmë ndërtimore me emrin “Premium Group”, me të cilën ndërtojnë ndërtesa në Prishtinë, dhe se paratë për këtë biznes profitabil mund t’i kenë marrë nga ndonjë projekt në Aeroport.
