Instituti Hidrometeorologjik i Kosovës (IHMK) përmes një komunikate për media ka njoftuar se, sipas parashikimeve, në javën e fundit të këtij viti do të mbajë mot relativisht i butë në Kosovë.
“Java e fundit e këtij viti do të shoqërohet me mot relativisht të butë me temperatura të cilat fillimisht do të jenë mbi vlerat e mesatareve deri në 11 gradë Celsius duke shënuar rënie në fundjavë”, thuhet në komunikatë, transmeton Koha.net.
IHMK shton se “nga mesi i javës do të ketë vranësira të theksuara, të cilat do të shoqërohen me reshje shiu, e në fundjavë do të ketë kushte për reshje bore”.
Temperaturat minimale do të lëvizin ndërmjet -3 dhe 3 gradë Celsius, ndërsa maksimalet e ditës parashihet të jenë prej 5 deri në 11 gradë Celsius.
Do të fryjë erë kryesisht nga juglindja me shpejtësi maksimale deri 15m/s, ndërsa gjatë vikendit do të ketë erë nga drejtimi i verilindjes me shpejtësi deri 7m/s.
