Qyteti i Drenasit së bashku më fshatra është kapluar nga të reshurat e shiut, ku është rritur niveli i ujit në disa fshatra të qytetit të Drenasit.
Zëdhënësi i Komunës së Drenasit Bekim Dobra, për portalin Drenica Press tha se “nga moti me shi në dy ditët e fundit, edhe në Komunën e Drenasit është rritur niveli i ujit në lumit “Drenica” dhe vendbanimeve të tjera, më ҫ’rast janë vështirësuar disa zona banimi, sidomos në Zabel i Ulët, Komoran, Shtrubullovë dhe Drenas.
Njësitet e emergjencave kanë qenë të mobilizuara gjatë 24 orëve të fundit dhe kanë bërë me dhjetëra intervenime, sidomos në objekte banimi dhe biznese, ku është kërkuar nga ana e qytetarëve dhe është e gatshme ne secilën situatë të krijuar. Shtabi i krizave emergjente ne kuadër të Drejtorisë së Shërbimeve Publike dhe Emergjencë kanë qenë të gatshëm dhe në koordinim të vazhdueshëm me Stacionin Policor në Drenas dhe me Shërbimin e Zjarrfikësve. Duke parë gjendjen e krijuar nga të reshurat e vazhdueshme të shiut, Komuna e Drenasit apelon të gjithë qytetarët që ne ato zona ku niveli i ujit është më i lartë, të bëjnë shoqërimin e fëmijëve dhe familjarëve të tyre dhe të reduktojnë lëvizjet e panevojshme deri në stabilizimin e gjendjes së krijuar nga moti i lig. Po ashtu lusim qytetarët në rast të ndonjë emergjence të lajmërojnë shërbimin e zjarrfikësve për të ju dal në ndihmë.
Me ndërtimin e disa urave, dhe rregullimin e gypave përcjellës, këtë vit, për dallim nga vitet e tjera, janë evituar disa vërshime, sidomos në fshatin Nekoc, Kizhnarekë dhe afër shtratit të lumit “Drenica” në Komoran.”
