Tomë Gashi, avokati i katër aktivistëve të Vetëvendosjes të cilët sot u shpallën fajtorë nga Gjykata, e ka quajtur këtë vendim si ‘masakër’ juridike, përkundër provave shfajësuese që ishin paraqitur deri më tani.
Ju e patë që përkundër gjitha provave që e dëshmojnë pafajësinë, kjo gjykatë për arsye politike i dënoi. Arsyeja e parë që ta mbulojnë vrasjen e Deharit dhe arsyeja politike, duke ditur faktin që ne i kemi më pak se 24 orë para zgjedhjeve komunale’’ tha ai, transmeton Periskopi.
‘’Besoj që keni vërejtur se kanë qena prova shfajësuese është e çuditshme, në kundërshtim me dispozita ligjore, vendore e ndërkombëtare. Unë besoj se prej filimit është parë se kemi të bëjmë me rast krejt politik, duke marrë parasysh edhe datën kur ata janë arrestuar. Dy ditë para cështjes së demarkacionit’’, theksoi ai.
Gashi vendimin e quajti masakër juridike, duke thënë se ju mbetet që ta vazhdojnë luftën për zbardhjen e pafajësisë.
Ai tutje ka treguar edhe për hapat konkret që do t’i ndërmarrin tutje.
‘’Ne do të bëjmë ankesë dhe do ta paraqesim në afatin ligjor dhe shpresojmë që instancat tjetra ligjore nuk do të jenë të ndikuara politikisht’’, shtoi ai.
