Trajneri i kombëtares shqiptare, Gianni De Biasi, ka komentuar ndeshjen mes Sevillas dhe Juventusit, e cila u zhvillua në kuadër të Ligës së Kampionëve
Gianni De Biasi, trajneri i Kombëtares shqiptare, i ftuar në studiot e televizionit zviceran RSI, ka komentuar ndeshjen e mbrëmshme në Ligën e Kampioneve mes Sevillas dhe Juventusit.
Ndonëse kampioni i Italisë fitoi me rezultat 3:1 dhe siguruan kalimin në fazën tjetër të turneut, De Biazi vlerëson negativisht paraqitjen e skuadrës nga Torino në këtë ndeshje.
“Juventusi kishte këtë mungesë të rëndësishme të Higuain, por nuk besoj se e justifikon paraqitjen që dhuroi. Rezultati përfundimtar është bindës, por mendoj se nga pikëpamja e cilësisë së lojës mund të bëjë shumë më tepër”, ka deklaruar italiani.
“Këtë herë arriti maksimumin me minimumin e sforcos. Por, besoj se duhet të respektojmë edhe Sevillan që del e humbur, por padyshim jo e mundur nga fusha e lojës. Diferencën thelbësore e bëri Franco Vazquez, i cili doli nga loja në mënyrë të palogjikshme dhe mendoj se ndeshja ktheu praktikisht pas këtij episodi”, u shpreh ai.
Ai mendon se një pikë kthese e ndeshjes ishte edhe goli i avantazhit i Juventusit, i shënuar nga Leonardo Bonuçi me një gjuajtje nga jashtë zonës. Ndërkaq, zhgënjimi më i madh i mbrëmjes për trajnerin e kuqezinjve është Miralem Pjaniç për të cilin nuk kursen kritikat.
