Kreu i PDK-së, Kadri Veseli, ka deklaruar se nëse ka konsensus ndërmjet partive politike, atëherë mund të shkohet në zgjedhje.
Kryetari i Kuvendit, Kadri Veseli, ka thënë se Kosova i ka përmbushur të gjitha kriteret për liberalizimin e vizave. Sipas tij, demarkacioni me Malin e Zi ka qenë kriter i panevojshëm që i është kërkuar Kosovës.
Veseli bën thirrje që demarkacioni të ketë konsensus nacional pasi, sipas tij, çdo vonesë në kalimin e kësaj çështjeje, do t’i kushtojë negativisht vetëm Kosovës dhe qytetarëve të saj, ka thënë ai në një intervistë për “Epokën e Re”.
Duke folur rreth riformatimit të Qeverisë, Veseli ka bërë me dije se PDK-ja është e gatshme për një proces të tillë. Ai ka thënë se janë në pritje të kryeministrit Isa Mustafa, përndryshe, sipas tij, PDK-ja do të vendosë brenda javës për bartësit e rinj të dy ministrive në Qeveri dhe disa ndryshime të zëvendësministrave.
Veseli ka deklaruar se sa i përket kërkesës së opozitës për zgjedhje të parakohshme, në qoftë se është në interesin e vendit shkuarja në zgjedhje, atëherë me marrëveshje politike askush nuk i ndal partitë politike që të mbahen zgjedhjet.
