Ish-shefi i Shtabit të UÇK-së, Azem Syla, është akuzuar nga Prokuroria e EULEX-it për udhëheqje të grupit kriminal prej 38 personave në rastin “Tokat”, shkruan sot Koha Ditore.
Grupi është ndarë në dysh, përmes dy aktakuzave. Në aktakuzën e parë, Prokuroria i ka akuzuar 22 persona, kurse në aktakuzën e dytë 17 persona.
Në bazë të njoftimit që është dërguar të martën për media është cekur me iniciale vetëm identiteti i Sylës, por jo edhe i 38-të të akuzuarve të tjerë.
Kjo ndarje, sipas avokatit mbrojtës të Sylës, por edhe njohësve të çështjeve juridike, është selektive dhe e papranueshme. Siç kanë thënë ata, Prokuroria nuk guxon të bëjë këso dallimesh në mes të të akuzuarve.
