Kryetari i komunës së Mitrovicës, Agim Bahtiri, sapo dha një lajm të mirë. Vetëm disa muaj pas hapjes, fabrika e kërpudhave Hirano Mushroom e ndërtuar në fsahtin Gushafc të Mitrovicë, pronë e familjes, po e bënë zgjerimin e kapaciteteve të saj.
Sipas Bahtirit kërkesat për produktet e kësaj fabrike janë të mëdha, dhe së shpejti do të hapen vende të reja punë duke u krijuar edhe 15 dhoma të reja për prodhimin e kërpudhave.
“Hirano Mushroom LLC ka filluar prodhimin në muajin qershor i këtij viti, por për shkak të kërkesave të mëdha për produktet e saj në Bashkimin Evropian, kompania ka filluar menjëherë me zgjerim të kapaciteteve. Kjo fabrikë tash po vazhdon me zgjerim të fuqishëm përmes investimit të fundit që tashmë ka filluar të ekzekutohet ku përfshinë krijimin e 15 dhomave të reja të rritjes. Kjo dëshmon se aty ku nuk ka korrupsion dhe haraç, mund të bëhet hapja e vende të reja të punës”, ka thënë Bahtiri.
I pari i Mitrovicës ka thënë se sipas analizave që i janë bërë kërpudhave, rezulton se kërpudhat që prodhohen në Mitrovicë janë më të mirat në botë.
“Kërpudhat Shiitake të Kosovës janë krahasuar me ato nga Kina, Holanda dhe Spanja dhe kanë rezultuar të jenë më të shëndosha nga të gjitha”, ka thënë Bahtiri./Drenicapress.info/
