Problemi i kishës serbe në oborrin e Universitetit të Prishtinës është ngritur edhe në Kuvendin e Kosovës, në hapjen e punimeve të sesionit vjeshtor, shkruan sot Koha Ditore.
Deputetët serbë janë ankuar se po shpërfillet trashëgimia e tyre, kurse ata shumicë shqiptarë i kanë cilësuar provokime të qëllimshme nga zyrtarët serbë punimet e iniciuara kinse për funksionalizimin e kishës.
Ka qenë deputetja e Lidhjes Demokratike të Kosovës, Besa Gaxheri, e cila ka kërkuar nga shefi i saj partiak, njëkohësisht kryeministër, Isa Mustafa, të ndërmarrë masa disiplinore ndaj zëvendëskryeministrit Branimir Stojanoviq. Sipas Gaxherit, zëvendëskryeministri Stojanoviq provokoi situatën politike me iniciativën për ta hapur kishën.
“Zëvendëskryeministër, meqenëse sot nuk qenka këtu, kërkojmë nga ju që t’ia tërhiqeni vërejtjen dhe të merrni masa disiplinore ndaj zëvendëskryeministrit Branimir Stojanoviq, i cili duke shkelur Kushtetutën dhe ligjet e këtij vendi kishte marrë iniciativë që të përgatiste kishën, gjoja se për ta hapur, për të provokuar situatën politike në vend”, ka thënë Gaxheri. Për ta dëgjuar kërkesën e Gaxherit në sallë nuk ishte kryeministri Isa Mustafa e as vartësi i tij, Stojanoviq.
