Drejtoria e Përgjithshme e Tatimeve ka dorëzuar në gjykatë listën e bizneseve që duan të mbyllin aktivitetin. Sipas të dhënave, 126 kompani në të gjithë vendin kanë shpallur falimentin.
Vihet re një rritje e numrit të kompanive që kërkojnë falimentit Gjatë vitit 2015 në gjykatë janë çuar 118 kompani kundrejt 126 gjatë këtij viti (8 muaj e parë).
Vlora është qyteti me numrin më të madh të bizneseve që kanë mbyllur aktivitetin, konkretisht 36 kompani, ndërsa Durrësi renditet në vendin e dytë me 27 shoqëri. Në kryeqytet ndërkohë numërohen vetëm 6 subjekte të cilat kanë shpallur falimentin.
Procedurat e komplikuara të falimentit kanë detyruar qeverinë që të hartojë një projektligj të ri i cili aktualisht është në diskutim në komisionet parlamentare.
Drafti i ri, parashikon ngritjen e Gjykatës së Falimentit, si një strukturë brenda gjykatës së rrethit, e cila do të merret me të gjitha procedurat e falimentit.
Ligji përcakton afate të qarta për dorëzimin e kërkesës për fillimin e procedurave të falimentit, ankimimit nga debitori dhe nisjes së seancave gjyqësore, të gjitha brenda një afati prej 1 muaj e gjysmë.
