Sulmuesi i Kombëtares shqiptare, Armando Sadiku, ka zbuluar se klubi që e dha huazim te Vaduzi në janar, tashmë kërkon një shifër të çmendur për shitjen e tij.
“Pas një bisede që menaxheri im ka bërë me drejtuesit e Zyrihut, ata i kanë konfirmuar se kërkojnë 7,5 milionë euro për kartonin tim”, shpjegoi Sadiku, duke treguar gjithashtu se pse kishte pranuar në janar ftesën e Vaduzit, një klubi shumë të vogël që rrezikonte asokohe rënien nga kategoria, shkruan Tele Sport.
“Nuk e ndieja me gjithë zemër që të shkoja te Vaduzi, por ishte trajneri ai që më bindi duke më premtuar vendin në formacion, madje më premtoi që do të isha unë që do të vendosja për emrat e sulmit që do të luanin me mua”, theksoi ai
Duke iu kthyer Europianit, 25-vjeçari e vlerësoi si një eksperiencë të paharrueshme. “Në Francë përjetuam emocione të mëdha dhe nëse do ta dija se shqiptarët do të ishin kaq entuziastë do të kërkoja të vrapoja edhe më shumë në fushën e lojës”, deklaroi Sadiku.
