Në këto momente është duke u zhvilluar një marsh kundër homofobisë, transfobisë dhe bifobisë në sheshin qendror të Prishtinës ku po marrin pjesë, përveç aktivistëve, edhe zyrtarë të lartë shtetërorë e përfaqësues të selive diplomatike në Kosovë.
Nga krerët institucionalë, në këtë marsh po merr pjesë presidenti i vendit, Hashim Thaçi, i cili po shoqërohet nga ambasadorët e SHBA-ve dhe Britanisë së Madhe, Greg Delawie, respektivisht Ruairi O’Connell.
Në këtë marsh është duke marrë pjesë edhe raportuesja për Kosovën, Ulrike Lunacek, e cila për mediat tha se do të duhej të kishte më shumë njerëz në këtë organizim për të mbështetur këtë grup, që shpesh në Kosovë shihet si komunitet i stigmatizuar.
Lunacek tha se nuk ka vend për frikë.
Ndërsa Delawie u shpreh i lumtur që po merr pjesë për të mbështetur të drejtat e këtij grupi.
E presidenti Thaçi, tha se ka dalë për të bërë ecjen e solidaritetit. Ai tha se të gjitha të drejtat e çdo komuniteti janë të garantuara me Kushtetutë.
“Çdo qytetar, pa dallim etnie, pa dallim seksi gëzon të drejtat e barabarta”, tha presidenti.
Marshi u mbajt me moton “Dashuria jonë është kushtetuese”.
Sot shënohet Dita Ndërkombëtare Kundër Homofobisë, Transfobisë dhe Bifobisë
