​31 të lënduar nga protesta e djeshme në Tiranë, 21 prej tyre policë

31 persona kanë marrë trajtim mjekësor në Spitalin Universitar të Traumës në Tiranë, si pasojë e përplasjeve gjatë protestës së djeshme (18 tetor), prej të cilëve 21 janë efektivë të policisë.

Sipas Ministrisë së Shëndetësisë dhe Mirëqenies Sociale të Shqipërisë, në mesin e të lënduarve janë 21 efektivë policie, pesë protestues, katër kalimtarë të rastit dhe një përfaqësuese e mediave, transmeton ATSH.

Në përditësimin e fundit, të publikuar sot (19 tetor), në orën 11:30, Ministria ka bërë të ditur se në Spitalin Universitar të Traumës ndodhen edhe dy protestues, të cilët po u nënshtrohen ekzaminimeve dhe konsultave të mëtejshme mjekësore.

Ndërkohë, që nga 13 tetori, numri i personave të shtruar në spital dhe që vijojnë të marrin trajtim mjekësor ka arritur në 14. Prej tyre, pesë janë efektivë policie, katër protestues, katër kalimtarë dhe një përfaqësuese e medias.

Ministria ka njoftuar se gjendja shëndetësore e tyre është e mirë.