Burime të portalit Republika.info brenda Partisë Demokratike të Kosovës kanë bërë të ditur emrat që po përfliten për 10-shen e parë në listën zgjedhore të kësaj partie.
Kryetari i PDK-së, Kadri Veseli pritet që të jetë edhe bartësi i listës.
Vendin e dytë sipas burimeve të Republika.info mund ta zë nënkryetari i PDK-së, Memli Krasniqi i cili në të kaluarën ka mbajtur postin e ministrit të Kulturës, Rinisë e Sportit e poashtu ka qenë edhe ministër i Bujqësisë.
Në vendin e tretë pritet të jetë këngëtarja dhe arkitektja Eliza Hoxha e cila muaj më parë i është bashkuar kësaj partie.
I kartëri në listën zgjedhore të PDK-së pritet të jetë Mergim Lushtaku i cili në zgjedhjet e fundit ka qenë në mesin e deputetëve më të votuar me mbi 19 mijë vota.
Uran Ismaili i cili aktuaisht është ministër i Shëndetësisë pritet të jetë i pesti. Kurse mbesa e presidentit Hashim Thaçit, Evgjeni Thaçi – Dragusha sipas burimeve brenda PDK-së pritet të jetë e gjashta në këtë listë.
Hajredin Kuçi pritet të jetë i shtati në listën zgjedhore të PDK-së. Kujtojmë se Kuçi në të kaluarën ka qenë ministër, si dhe zëvendëskryeministër në Qeverinë Thaçi.
Nënkryetari tjetër i PDK-së, Enver Hoxhaj pritet të jetë i teti në këtë listë. Hoxhaj aktualisht është zëvendëskryeministër në largim.
Ish-kandidatja e PDK-së për kryetare të MItrovicës, Valdete Idrizi pritet të jetë e nënta në listë.
Ndërsa top 10-shen e kësaj partie pritet ta përmbyll Shqiptar Demaçi, djali i veprimtarit të shqyar të çështjes kombëtare, Adem Demaçit.
