Një mjek nga Kalifornia, i cili i dha ketaminë yllit të serialit “Friends”, Matthew Perry, është dënuar me 30 muaj burg federal.
Kështu, ai u bë personi i parë që merr një dënim për vdekjen e aktorit nga mbidoza, shkruan BBC.
Dr. Salvador Plasencia ishte një nga pesë të akuzuarit në një hetim federal shumëvjeçar që shqyrtoi se si Perry e siguroi anestezionin disociues – përmes një rrjeti nëntokësor droge, në Hollywood.
Perry, 54 vjeç, u gjet i vdekur në shtëpinë e tij në Los Angeles në vitin 2023.
Për disa vjet me radhë, ai luftoi me depresionin dhe varësinë.
Familja e aktorit i kërkoi gjykatësit një dënim të gjatë, duke e quajtur Plasencia-n “më fajtorin” dhe duke detajuar vështirësitë e tyre për të kuptuar pse ai e furnizonte vazhdimisht Perry-n me drogë.
