Kryetari i Federatës së Futbollit të Kosovës (FFK), Agim Ademi, ka qenë sot mysafir i klubit Hoffenheim në ndeshjen kundër Heidenheim në kuadër të Bundesligës gjermane.
Në këtë përballje, për Hoffenheimin luajtën Asllani, Hajdari dhe Abdullahu, ndërsa për Heidenheimin ishin në formacion portieri Diant Ramaj dhe Arijon Ibrahimovic, të dy me prejardhje kosovare, transmeton lajmi.net.
Ademi ka shprehur entuziazmin e tij për faktin që pesë futbollistë kosovarë ishin pjesë e dy ekipeve gjermane në një ndeshje të vetme.
“Vërtet ishte kënaqësi t’i shihje pesë futbollistë kosovarë në dy ekipe të Bundesligës. Uroj që shumë shpejt t’i shohim të gjithë me të njëjtën uniformë!”, ka shkruar Ademi.
Ky mesazh i kreut të FFK-së është parë si një ftesë simbolike që futbollistët me origjinë kosovare, si Ramaj dhe Ibrahimovic, t’i bashkohen përfaqësueses së Kosovës në të ardhmen./lajmi.net/
