Është larguar gjatë luftës së Kosovës, si refugjat, derisa tani është shumë i suksesshëm në Kanada.
Ky është Mërgim Veliu, i cili tani trajnon plot të rinj në fushën e pilotimit.
Mërgimi e kishte lënë Kosovën si shtatëvjeçar, si refugjat i luftës, për t’u bërë më pastaj trajnues i pilotëve në Kanada, ku edhe jeton me familjen e tij, raporton “Klan Kosova”.
25-vjeçari që e kreu shkollën atje, dhe tani është shumë i suksesshëm. Mërgimi me keqardhje pranon se këtë nuk do ta arrinte po të ishte rritur në Kosovë.
“Shteti i Kanadasë më ka ndihmuar. Aty trajnohen shumë pilotë të rinj, ka shumë nga Kina, që më pas kthehen në vendlindjet e tyre”, thotë ai.
Gjithë njohuritë që ka në këtë fushë Mërgimi thotë se me shumë dëshirë do t’i bartë edhe në Kosovë, kurdo që të krijohen mundësitë. “Me dëshirë do të kisha ndihmuar edhe vendin tim”, theksoi Mërgimi.
