Me rastin e shënimit të 35-vjetorit të vizitës historike të shtatë senatorëve amerikanë në Kosovë, të prirë nga senatori Robert Dole, shoqata “Miqtë e Amerikës” përkujtoi këtë ditë, duke e vlerësuar si një nga momentet më të rëndësishme për popullin e Kosovës në periudhën e represionit serb.
Kryetari i kësaj shoqate, Agim Rexhepi, tha se kjo vizitë ishte ngjarja më e madhe për shqiptarët e asaj kohe, duke shënuar paralajmërimin e parë të lirisë.
“Kjo ngjarje është madhore për gjithë ata njerëz që kanë jetuar në atë kohë, që kanë përjetuar dhunën sistematike të regjimit në ish-Jugosllavi, pastaj regjimit serb të Millosheviqit e dinë që kjo vizitë ka qenë ngjarja më madhore për kombin tonë. Kjo ka qenë ajo shpresa, ai informacioni i parë, paralajmërimi i parë i senatorit Bob Dole që ka thënë se ‘liria po vjen, demokracia po vjen’. Ajo fjalë është mbajtur në Hotel Grand”, tha Rexhepi.
Ai shtoi se vizita e senatorit Dole nuk ishte e vetme, pasi së bashku me të kishin ardhur edhe gjashtë senatorë të tjerë amerikanë.
“Me senatorin Dole kanë ardhur edhe gjashtë senatorë të tjerë. Kjo ka qenë ajo dallëndyshja e parë, paralajmërimi i parë për popullin e Kosovës që do ta kemi përkrahje dhe u arrit edhe liria”, u shpreh ai.
