Trepça’89 kishte hyrë në sezonin që sapo përfundoi si kampion aktual i Kosovës, mirëpo, ka pasur formë shumë të luhatshme dhe nuk ka qenë asnjëherë pretendent serioz për të mbrojtur titullin.Duke u nisur nga kjo, kryesia e këtij klubi duket se për sezonin e ardhshëm, ka filluar të përgatitet shumë më herët.
Ky klub, ende pa filluar afati kalimtar për futbollistë në Kosovë ka bërë hapin e parë, që është konfirmimi i trajnerit.Kryetari i Trepçës ’89, Abedin Zeka, ka konfirmuar se skuadrën në edicionin e ri do të vazhdojë ta drejtojë Gugash Magani. Sipas Zekës, Magani do të mbetet në krye të ekipit bashkë me stafin e tij.Përveç kësaj, ai shtoi se gjatë kësaj vere do të ketë mjaftë përforcime jo vetëm nga Superliga, por edhe nga jashtë Kosovës.Krejt në fund Zeka tha se largimet e këtyre ditëve të Hajdarit, Lladrovcit dhe Islamit, ishin të paralajmëruara më herët pasi të treve u kishte skaduar kontrata.
