Tre të dyshuar për ekstremizëm në Shkup, Prokuroria për krim të organizuar kryen arrestime

Prokuroria kundër krimit të organizuar njoftoi se ka nisur hetim ndaj tre personave nga Shkupi, të dyshuar për “zhvillim të organizatës kriminale” dhe “prodhim, mbajtje dhe tregtim të paautorizuar të armëve dhe materialeve shpërthyese”.

Hetimet tregojnë se të dyshuarit janë organizuar për hakmarrje për të afërmit e tyre të dënuar më parë për pjesëmarrje në organizatë terroriste, veprojnë si grup me ideologji radikale islamiste dhe dyshohet se kanë mbledhur fonde brenda dhe jashtë vendit për propagandë dhe blerje armësh.

Sipas vendimit të gjykatës, janë kryer kontrollime në shtëpi dhe hapësira të ndryshme në Shkup, ku janë sekuestruar armë, pajisje elektronike dhe prova të tjera materiale. Të tre të dyshuarve u është caktuar arrest 30-ditor.