Shefi i Asamblesë së Lidhjes Demokratike të Kosovës në Prishtinë, Egzon Pacolli, ka reaguar ndaj deklaratave të asamblistit të Vetëvendosjes, Gëzim Sveçla, lidhur me draft-rregulloren për tarifa, ngarkesa dhe gjoba komunale.
Pacolli tha se Vetëvendosje po mashtron opinionin publik, duke theksuar se në Kuvendin Komunal nuk është votuar vendosja e tarifës prej 10 eurosh për hyrje në Prishtinë, por vetëm dërgimi i draft-rregullores në diskutim publik.
Sipas tij, në këtë fazë bëhet fjalë për një procedurë normale, ku qytetarët dhe palët e interesit kanë mundësi të japin komentet dhe vërejtjet e tyre.
Ai shtoi se Vetëvendosje ka votuar pro dërgimit të rregullores në diskutim publik në Kuvend, ndërsa tani po paraqitet publikisht sikur ka qenë kundër saj.
