Çmenduri në javën e parafundit të La Ligas, me Atletico Madrid që ka arritur të bëjë përmbysjen e titullit ndaj Osasunës në shtëpi, me fitoren 2-1 që u vulos nga Suarez. Real Madrid triumfoi në Bilbao 0-1, ndërsa Barcelona hoqi dorë përfundimisht nga gara pas humbjes befasuese 1-2 ndaj Celtas.
Atletico Madrid dominoi gjithçka në pjesën e parë ndaj Osasunës, por asnjë nga tentativat nuk shkoi në rrjetë dhe fraksioni u mbyll 0-0.
Në pjesën e dytë, madrilenët u hodhën në sulm në kërkim të fitores dhe në minutën e 75-të e pësuan në kundërsulm. Zhgënjim i madh te djemtë e Simeones që panë shpresat e titullit t’i largoheshin, por çdo gjë ndryshoi.
Fillimisht, Renan Lodi shënoi në minutën e 81’, duke barazuar 1-1 dhe pëmbysja e çmendur erdhi 3 minuta para fundit. I zakonshmi Luis Suarez shkundi rrjetën dhe çoi shifrat në 2-1. Festë e çmendur tek Atletico që tashmë është vetëm një fitore larg titullit kampion.
Nga ana tjetër, në Bilbao, Real Madrid mban gjallë shpresat për titull, pasi ka fituar me shifrat 0-1. Një gol i Nachos i në minutën e 68’ ka mjaftuar për fitoren 0-1. Surpriza e madhe ka ardhur në “Camp Nou”, ku Barcelona i ka thënë lamtumirë titullit pas humbjes shokuese 1-2 ndaj Celta Vigos.
Messi shënoi në minutën e 28’, por Santi Mina përmbysi gjithçka. Fillimisht, Mina barazoi në pjesën e parë dhe në minutën e 89’ shënoi golin e surprizës së madhe, që nxjerr jashtë gare përfundimisht Barcelonën.
