Vetëm pesë ditë pasi Edi Rama kërkoi zgjedhje të parakoshme në Bashkinë e Tiranës, këshilltarët socialistë janë vënë në lëvizje.
Abc News mëson se anëtarët e Këshillit Bashkiak janë thirrur sot në orën 17:00 në një mbledhje në selinë rozë. Ndonëse nuk kanë marrë informacion mbi arsyet e takimit, besojnë se do diskutohet për fatin e Erjon Veliaj.
“Ne duhet të marrim vendim politik për t’i hapur rrugë zgjedhjeve për një kryetar bashkie të ri në Tiranë.”
Në Asamblenë e Partisë Socialiste, kryeministri Edi Rama iu kërkoi anëtarëve socialistë të Këshillit Bashkiak, që të shkarkonin Erion Veliaj, i cili prej datës 10 shkurt të këtij viti ndodhet nën masën e arrestit me burg të dhënë nga GJKKO, pasi akuzohet për korrupsion nga SPAK. Ai propozoi Ogerta Manastirliun si kandidate për Bashkinë e kryeqytetit.
Por ende nuk ka një datë se kur këshilli bashkiak mund mblidhet , por ligji parashikon se mbledhja duhet të njoftohet 5 ditë përpara. Ligji parashikon nisjen e proceduarave të shkarkimit të kryetarit nëse ky i fundit nuk paraqitet në detyrë 3 muaj pa ndërprerë dhe duhet të marrë votat e shumicës së këshilltarëve.
Me tej vendimarrja i takon këshillit të ministrave që vendos shkarkimin. Por në rast se Erjon Veliaj do të ankimonte në Gjykatën Kushtetuese brenda 15 ditësh, vendimi do të pezullohej deri në një vendimarrje të gjykatës. Në rast se jo, i hapet rruga presidentit Bajram Begaj të dekretojë zgjedhjet e parakoshme.
