Skenderaj sot e nderoj njeriut e urtë të Drenicës në një akademi solemne për nder të kontributit të tij të dhënë. Sot në Shtëpinë e Kulturës “ Hasan Prishtina” në Skenderaj, u shënua 100 vjetori i lindjes së Mujë Loshit, një njohës i shkëlqyer i filozofisë popullore, historisë, etnografisë dhe dokeve e zakoneve shqiptare. Mjeshtër i odës dhe traditës. Ai ishte nder veprimtarët më të angazhuar në procesin e pajtimit të gjaqeve në fillim të viteve 90-ta.
Organizuar nga Drejtoria për Kulturë, Rini dhe Sport dhe Instituti Albanologjik në Prishtinë është përuruar libri kushtuar filozofit popullor të Drenicës Mujë Loshi, në 100 vjetorin e lindjes së tij.
Në këtë ceremoni, për Mujë Loshin dhe librin kushtuar atij, pra të pranishmëve folën përfaqësues të Komunës së Skenderajt, studiues të folklorit dhe shkrimtarë e poet, transmeton Drenica Press.
Në emër të Komunës së Skenderajt ka folur drejtori për Kulturë, Hajriz Koci, ndërsa për figurën e Mujë Loshit dhe librin e autorit folën prof. Zymer Nezir, prof. Mehmet Rukiqi, Daut Demaku dhe autori Fazli Hajrizi.
Të pranishmit në këtë aktivitet kulturor i përshëndeti edhe vajza e Mujë Joshit, Fetije Loshi. Gjithashtu nga aktori Shaqir Bejta u interpretuan pjesë të tregimeve të shkurtra dhe me porosi të qarta të Mujë Loshit.
Në fund autori i librit “Mujë Loshi”, Fazli Hajrizi, i ndau disa ekzemplarë të këtij libri Bibliotekës Komunale në Skenderaj, të cilat u pranuan nga drejtori i Bibliotekës, Musa Dërguti.
- Advertisement -
