Puna e shkrimtarit Azem Deliu edhe njëherë e pa dritën jashtë kufijve shqipfolës.
Këtë herë, teksti i tij “Vajzës së palindur”, është botuar në revistën kulturore polake “Fabularie”.
Kështu ka bërë të ditur vetë Deliu, teksa është shprehur i priviligjuar që emri i tij gjendet mes shkrimtarëve të njohur.
“Kënaqësi e veçantë për mua që revista kulturore polake Fabularie ka botuar tekstin tim “Letër vajzës së palindur”, përkthyer në polonisht nga Agata Rogos. Studiuesen e Universitetit të Varshavës, Katarzyna Tayczinska, e falenderoj për artikullin e shkruar për mua. Nder e privilegj të jem mes emrave të njohur të artit ballkanik si Marina Abramoviç e Lidja Dimkovska, fituese e Çmimit Europian për Letërsi, në kopertinën e këtij numri special për Ballkanin”, ka shkruar Deliu në Facebook.
Tekstin “Vajzës së palindur nga Azem Deliu, mund ta lexoni në këtë LINK.
Azem Deliu është një shkrimtar i ri nga Skenderaj. Libri i tij i parë është “Funerali i shiut” (poezi), por më të njohur e bëri romani “Puthësi i paligjshëm”. Përpos që u kërkua nga lexuesit shqiptarë, ky roman u botua edhe në gjuhën angleze.
Ndërkaq, libri i tij më i fundit është novela “Shënimet e krimbit Smolinski”.
