Autoriteti Rregullator për Shërbimet e Ujit ka nxjerrë vendim për ndalimin e përdorimit të ujit të pijshëm nga sistemi publik i furnizimit për qëllime që nuk lidhen me nevojat themelore të konsumit njerëzor gjatë sezonit veror.
Sipas vendimit, ndalohet përdorimi i ujit të pijshëm për ujitjen e rrugëve, trotuareve dhe sipërfaqeve të tjera publike apo private, larjen e automjeteve, ujitjen e kopshteve, livadheve dhe tokave bujqësore, mbushjen e pishinave, si dhe për çdo përdorim tjetër që nuk ka për qëllim nevojat themelore të konsumit njerëzor.
Autoriteti Rregullator për Shërbimet e Ujit obligon ofruesit e shërbimeve të ujit të monitorojnë në terren, të identifikojnë dhe evidentojnë rastet e keqpërdorimit të ujit të pijshëm, si dhe të ndërmarrin masa për reduktimin e furnizimit me ujë në rastet e shfrytëzimit që bie në kundërshtim me vendimin, njofton Kompania Rajonale e Ujësjellësit “Prishtina”.
Në arsyetimin e vendimit thuhet se gjatë sezonit veror praktika e konsumit të ujit të pijshëm është në rritje, ndërsa është konstatuar se një pjesë e konsiderueshme e ujit përdoret për qëllime që nuk lidhen me nevojat themelore të konsumit njerëzor.
Sipas Autoritetit Rregullator për Shërbimet e Ujit, këto veprime ndikojnë drejtpërdrejt në zvogëlimin e kapaciteteve furnizuese dhe rrezikojnë furnizimin e rregullt e të qëndrueshëm me ujë të pijshëm.
Vendimi ka hyrë në fuqi më 1 qershor 2026 dhe do të zbatohet gjatë sezonit veror deri më 31 tetor 2026.
