Nënkryetari i Komunës së Prishtinës dhe Lëvizjes Vetëvendosje, Dardan Sejdiu, ka shkruar në llogarinë e tij në Facebook se Presidenti i Kosovës, Hashim Thaçi, kryeministri, Isa Mustafa dhe kryeparlamentari, Kadri Veseli, janë njerëz që kanë punuar në dëm të Kosovës, ndaj prej tyre “hajër nuk ka”, njofton Klan Kosova.
“Thaçi nisi dialogun teknik i cili solli ‘Zajednicën’ që bosnjizon Kosovën. Thaçi nisi dialogun teknik i cili solli Listën Srpska që është sot partner qeverisës, partneritet ky që u nënshkrua nga Thaçi dhe Mustafa. Thaçi ka nënshkruar marrëveshje asfalti që çdo vit që nga viti 2008 i kushton buxhetit qindra milion euro me një kontratë që asnjëherë nuk është bërë publike”, shkruan Sejdiu duke vazhduar edhe se “Thaçi privatizoi krejt fabrikat e asetet e Kosovës dhe nuk e shndërroi Kosovën në ‘Sillicon Valley’ siç premtonte por në fole të krimit, korrupsionit, e nepotizmit”.
“Thaçi pra është një profiter ordiner i cili gjithë punën e tij në qeveri dhe presidencë e ka të lidhur me Serbi, asfalt/privatizim, dhe kapje të shtetit. Thaçi krejt këto nuk i ka bërë i vetëm, ortak kishte dhe e ka Veselin, ortak kishte dhe e ka Mustafën. Dhe prej këtyre hajër nuk ka”.
