Douglas Luiz më në fund është rikthyer të luajë rregullisht në elitën e futbollit gjatë huazimit të tij tek Aston Villa, por sa do t’i kushtojë klubit të Premierligës për ta transferuar përfundimisht brazilianin nga Juventus?
Kanë qenë disa vite të çuditshme për Douglas Luiz, i cili mori vlerësime të mëdha në fund të periudhës së tij të parë me Villën, që nisi në vitin 2019 dhe përfundoi në 2024.
Paraqitjet e tij, sidomos gjatë sezonit 2023-24, i siguruan një transferim të madh financiar, duke iu bashkuar Juventusit në një marrëveshje me vlerë 50 milionë euro.
Pavarësisht paraqitjeve premtuese në Premierligë, Douglas Luiz nuk arriti të përshtatej menjëherë në Serie A dhe shpejt mbeti jashtë planeve të ekipit të parë të bardhezinjve. Në fund, ai zhvilloi vetëm 19 ndeshje në Serie A gjatë sezonit të tij të parë në Itali, dhe vetëm tri prej tyre si titullar.
“Zonja e Vjetër” vendosi të minimizojë humbjet gjatë afatit kalimtar të fundit veror, duke e dërguar Douglas Luiz në huazim njësezonal te Nottingham Forest, me një detyrim të kushtëzuar blerjeje.
Megjithatë, kryesisht për shkak të lëndimeve, Douglas Luiz hasi vështirësi për të lënë gjurmë në “City Ground” dhe u kufizua në vetëm tetë paraqitje në kampionat gjatë gjysmës së parë të sezonit 2025-26.
Marrëveshja e tij e huazimit u ndërpre në janar, duke i hapur rrugën rikthimit te Aston Villa, këtë herë sërish në formë huazimi, por me opsion blerjeje.
Që atëherë, Douglas Luiz ka realizuar katër ndeshje radhazi si titullar dhe po duket gjithnjë e më i stabilizuar në ambientin e njohur të “Villa Park”.
Nëse Aston Villa do të aktivizojë klauzolën e blerjes këtë sezon, Juventusi do të përfitojë 25 milionë euro, shumë kjo e pagueshme përgjatë tre viteve financiare. Përveç kësaj, bardhezinjtë mund të përfitojnë edhe bonuse deri në 3.5 milionë euro, siç konfirmoi klubi në janar./GazetaExpress/
