Rusia: Territori në qendër të bisedimeve të nesërme me Ukrainën
Rusia synon të negociojë me Ukrainën për çështjet territoriale gjatë bisedimeve dy-ditore që nisin të martën në Gjenevë, bëri të ditur zëdhënësi i Kremlinit, Dmitry Peskov.
Ai theksoi se prania e kryenegociatorit Vladimir Medinsky “do të jetë e nevojshme”, sipas raportimeve të mediave ruse.
Medinsky kishte marrë pjesë më parë në bisedime me palën ukrainase, por mungonte në negociatat e zhvilluara në Abu Dhabi në fillim të këtij viti, pasi ato trajtonin çështje ushtarake jashtë portofolit të tij. Kremlini njoftoi se raundi i ri në Gjenevë do të ketë format të zgjeruar dhe do të përfshijë edhe kreun e inteligjencës ushtarake, Igor Kostyukov, si dhe zëvendësministrin e jashtëm Mikhail Galuzin.
Çështjet territoriale mbeten pengesë
Moska është e pakënaqur me refuzimin e Kievit për të hequr dorë nga territoret e pretenduara nga Rusia, përfshirë rajonin e Donetsk. Presidenti ukrainas Volodymyr Zelensky ka paralajmëruar vazhdimisht se Vladimir Putin nuk duhet të marrë asnjë “dhuratë” në negociata.
Lexo edhe32-vjeçari humb jetën tragjikisht pasi u përplas nga treni, postimi i fundit në Facebook prek rrjetin
Para bisedimeve, Galuzin iu referua edhe propozimit të Putinit për ta vendosur Ukrainën përkohësisht nën administrimin e OKB. Sipas tij, Moska është e gatshme të diskutojë me SHBA-në, vendet evropiane dhe shtete të tjera, deklaratë e dhënë për agjencinë shtetërore TASS. Propozimi ishte refuzuar gjerësisht vitin e kaluar.
Ndërkohë, sipas Kremlinit, në Gjenevë po zhvillohen edhe bisedime dypalëshe mes Shteteve të Bashkuara dhe Rusisë për çështje ekonomike. Në këto takime merr pjesë i dërguari special i Putinit, Kirill Dmitriev, i cili është takuar disa herë me kryenegociatorin amerikan Steve Wittkoff.
Dmitriev po shtyn përpara heqjen e sanksioneve ndaj Rusisë dhe ringjalljen e marrëdhënieve ekonomike me SHBA-në në rast të një marrëveshjeje paqeje. Moska vazhdon të deklarojë se dëshiron t’i japë fund luftës së nisur gati katër vjet më parë, por vetëm sipas kushteve të saj — kërkesa që Ukraina i ka hedhur poshtë si të papranueshme.
