Agjencia Kadastrale e Kosovës është duke digjitalizuar rrugët e reja të vendit, një proces që e ka detyruar edhe Komunën e Prishtinës të dalë me propozime për emërtimin e tyre
Qytetarët pritet të kenë fjalën e fundit për emrin që do të mbajë secila rrugë, por lista e propozimeve ka zbuluar një detaj që vështirë se mund të kalojë pa u vënë re. Të gjithë emrat janë të burrave.
Në mesin e tyre shfaqen dëshmorë, heronj të luftës, figura historike, por edhe mësues, famullitarë e personalitete të tjera të gjinisë mashkullore. Por asnjë grua e vetme.
Demokracia.com, duke shfletuar një pjesë të vogël të dëshmive e dokumenteve të Komunës për procesin e emërtimit, nuk ka arritur të gjejë asnjë emër gruaje që është propozuar për të hyrë në hartën e kryeqytetit.
Pra, rrugët janë të gjitha për burrat, për Hamdiun, Ganiun, Bajramin, Hysniun, Idizin e të tjerë. Nëse kërkon ndonjë Hanë, Shehide, Vjollcë apo Shkurte, nuk gjendet.
Ky fenomen s’është vetëm çështje simbolike, por një dëshmi e mënyrës se si historia dhe shoqëria vazhdon të dokumentohet e përjetësohet vetëm përmes figurave mashkullore.
