Sipas të dhënave të publikuara nga Agjencia e Statistikave të Kosovës (ASK), transporti ajror në Kosovë ka shënuar rritje të dukshme gjatë muajit Shtator 2025.
Numri i fluturimeve dhe i udhëtarëve ka qenë më i lartë krahasuar me të njëjtën periudhë të vitit paraprak, duke reflektuar një dinamikë më pozitive në këtë sektor.
Sipas ASK-së, në Shtator 2025 janë realizuar gjithsej 1,196 fluturime, që paraqet një rritje prej 7.3% krahasuar me Shtatorin 2024, kur ishin regjistruar 1,115 fluturime.
Edhe numri i udhëtarëve ka shënuar rritje të konsiderueshme. Në total, aeroporti ka regjistruar 374,982 udhëtarë, apo 8.9% më shumë sesa në Shtator 2024, ku ishin 344,294 udhëtarë.
Rritje është vërejtur si te udhëtarët në ardhje, ashtu edhe te ata në nisje: Udhëtarët në ardhje janë rritur nga 152,231 në 165,570, një rritje prej 8.8%.
Udhëtarët në shkuarje janë rritur nga 192,063 në 209,412, apo 9.0% më shumë.
