Lideri i Lëvizjes Vetëvendosje, Albin Kurti, gjatë ditës së djeshme i ka refuzuar të dyja ftesat e presidentit Hashim Thaçi për t’u konsultuar për caktimin e mandatarit të ri. Ngutësia e presidentit Thaçi për ta ftuar Kurtin dy herë brenda një dite është parë si e qëllimshme, përderisa edhe mospranimi i Kurtit që të takohet me Thaçin është konsideruar mosgatishmëri e tij për të marrë përgjegjësi qeverisëse, shkruan gazeta “Zëri”.
Një ditë pas konstituimit të Kuvendit të Kosovës presidenti i vendit Hashim Thaçi e shfrytëzoi të drejtën e tij ta thërrasë për konsultim liderin e Lëvizjes Vetëvendosje Albin Kurtin si fitues të zgjedhjeve të tetorit për caktimin e mandatarit për formimin e qeverisë. Madje ftesën e njëjtë Thaçi e bëri dy herë brenda ditës. Por të dyja ftesat e tij u refuzuan nga Kurti për shkak të, siç ka thënë ai, mosprezencës së tij në vend.
Ngutësia e presidentit Thaçi për ta mandatuar sa më parë kryeministrin e ri po shihet si e qëllimshme për t’ia kufizuar afatin kohor Lëvizjes Vetëvendosje dhe Lidhjes Demokratike të Kosovës për arritjen e koalicionit qeverisës. Mirëpo edhe anulimi i takimit me Thaçin nga ana e Kurtit, sipas partive tashmë opozitare, është parë si mungesë gatishmërie e tij që t’i marrë përgjegjësitë të cilat do t’i takojnë në qeverinë e re, shkruan tutje “Zëri”.
Por pavarësisht kësaj, analistët vlerësojnë se takimi është i pashmangshëm në mënyrë që të vazhdojë procedura për formimin e institucioneve të reja.
