Ministri për Integrime, Bekim Çollaku ka njoftuar se sot është marrë vendimi nga Qeveria e Kosovës për miratimin e Kartës për hapjen e të dhënave, që u garanton individëve, mediave, shoqërisë civile e bizneseve qasje në shënimet qeveritare.
Sipas Çollakut, në këtë aspekt Kosova po zë trendët e fundit evropiane dhe botërore.
“Përveç faktit që ky hap është shumë i rëndësishëm drejt rritjes së transparencës dhe llogaridhënies, nga hapja e të dhënave përfitojnë institucionet publike dhe private dhe përfundimisht çdo qytetar”, ka shkruar ministri në faqen e tij zyrtare në Facebook.
Çollaku thekson se qasja në shënimet e qeverisë mund të fuqizoj individët, mediat, shoqërinë civile dhe bizneset, në mënyrë që të ketë rezultate më të mira në shërbimet publike dhe qeverisjen e mirë.
“Karta të cilën kemi miratuar është në pajtim të plotë me parimet dhe praktikat më të mira e të dhënave të hapura”, ka shkruar ai në fund.
