Prokuroria Themelore në Prizren ka ngritur aktakuzë ndaj të pandehurit B.G., i cili akuzohet për tentim-vrasje të rëndë dhe armëmbajtje pa leje.
Sipas Prokurorisë, Departamenti i Krimeve të Rënda ka dorëzuar aktakuzë kundër të pandehurit për veprat penale “Vrasja e rëndë në tentativë” dhe “Mbajtja në pronësi, kontroll ose posedim të paautorizuar të armëve”, sipas neneve përkatëse të Kodit Penal të Republikës së Kosovës, transmeton lajmi.net.
Ngjarja ka ndodhur më 17 tetor 2025, rreth orës 00:10, në banesën familjare në Prizren. Prokuroria pretendon se B.G., pas një konflikti të çastit me motive xhelozie, ka sulmuar me thikë bashkëshorten e tij M.A., duke e goditur gjashtë herë dhe duke i shkaktuar dëmtime të rënda të organeve të brendshme.
Gjatë incidentit, sipas aktakuzës, ai ka goditur me thikë edhe vajzën e mitur të viktimës, e cila kishte tentuar të ndërhynte, duke i shkaktuar lëndime serioze në kraharor dhe bark. Lëndimet e tyre janë konfirmuar nga ekspertiza mjeko-ligjore e datës 24 nëntor 2025.
Prokurori i çështjes ka kërkuar nga gjykata që, pas shqyrtimit gjyqësor dhe administrimit të provave, i pandehuri të shpallet fajtor dhe të dënohet sipas ligjit./lajmi.net/
