Presidenti i Francës: Bashkimi Evropian shumë i dobët dhe joefikas për momentin

Presidenti i Francës, Emmanuel Macron, deklaroi të martën se Bashkimi Evropian është shumë e dobët, shumë e ngadaltë dhe shumë joefikase për momentin.

“Evropa, që ne njohim, është sot tepër e dobët, shumë e ngadaltë dhe tepër joefikase. Por vetëm Evropa mund të na japë mjete për të vepruar në skenën botërore përballë sfidave tona të ditës. BE-ja duhet të reformohet me mbështetjen e popujve për të qenë sovrane, e bashkuar dhe demokratike”, tha ai gjatë një fjalimi në Universitetin e Sorbonës, në Paris.

Pasi u bëri thirrje liderëve të vendeve anëtare të BE-së për të marrë në konsideratë dhe shqyrtuar këtë çështje, Emmanuel Macron shprehu dëshirën e tij për përpilimin e një liste përpara zgjedhjeve të Parlamentit Evropian në vitin 2019 dhe zgjedhjen e gjysmës së eurodeputetëve sipas kësaj liste.

Macron theksoi gjithashtu se duhet që Eurozona të bëhet një fuqi ekonomike botërore e atillë që të konkurrojë Kinën dhe Shtetet e Bashkuara të Amerikës, si dhe që të reduktohet shkalla e papunësisë në vendet e BE-së, ku çdo 1 ndër 5 të rinj është i papunë.

Duke tërhequr vëmendjen mbi mungesën e kulturës së përbashkët strategjike të vendeve të BE-së në fushën e mbrojtjes, presidenti francez propozoi si të nevojshëm forcimin e Evropës për mbrojtjen dhe sigurinë duke krijuar një forcë të përbashkët për ndërhyrjen evropiane, një buxhet për mbrojtjen e përbashkët dhe një doktrinë të përbashkët për të reaguar.

Ai kërkoi gjithashtu krijimin e një akademie evropiane të inteligjencës, një prokurorie evropiane kundër terrorizmit, një force të përbashkët për mbrojtjen civile kundër fatkeqësive natyrore, një zyre evropiane për azilkërkuesit dhe një policie kuftiare evropiane.