Është arrestuar një person në fshatin Peran të Podujevës, pasi gjatë një kontrolli në oborrin dhe shtëpinë e tij janë gjetur dhe sekuestruar bimë narkotike të kultivuara në mënyrë ilegale.
Sipas raportit të policisë, gjatë kontrollit të kryer me vendim të prokurorit në datën 9 gusht në orën 12:20, në vendin e ngjarjes janë zbuluar dhe konfiskuar pesë bimë narkotike me gjatësi rreth 35 centimetra dhe peshë totale prej rreth 17.09 gram.
I dyshuari mashkull është arrestuar dhe më pas, pas intervistimit, me vendim të prokurorit është liruar në procedurë të rregullt.
“Peran, Podujevë 09.08.2025- 12:20. Është raportuar se i dyshuari m/k kultivon bimë narkotike brenda oborrit të tij. Njësitë policore kanë dal në vendin e ngjarjes dhe me vendim të prokurorit është bërë kontrolla e shtëpisë së dyshuarit dhe objekteve përcjellëse ku gjatë kontrollit janë gjetur dhe sekuestruar pesë bimë lëndë narkotike me gjatësi rreth 35 cm me peshë të përgjithshme rreth 17.09 gr. I dyshuari është arrestuar dhe pas intervistimit me vendim të prokurorit është liruar në procedurë të rregullt”, thuhet në raportin 24-orësh të policisë./IndeksOnline/
