Komisioni Qendror i Zgjedhjeve (KQZ) ka miratuar certifikimin e grupit të katërt të subjekteve politike dhe kandidatëve për pjesëmarrje në Zgjedhjet Lokale të 12 tetorit 2025.
Gjatë mbledhjes së mbajtur të enjten, KQZ certifikoi 33 subjekte politike dhe gjithsej 4,913 kandidatë, përfshirë 156 kandidatë për kryetarë komunash dhe 4,757 kandidatë për asamble komunale.
Në mesin e subjekteve të certifikuara janë të gjitha partitë kryesore, përfshirë Lëvizjen Vetëvendosje me 939 kandidatë, PDK-në me 915 kandidatë, LDK-në me 867 dhe AAK-në me 686 kandidatë.
Gjithashtu janë certifikuar edhe parti të komuniteteve joshumicë dhe subjekte të reja politike, transmeton lajmi.net
Megjithatë, Lista Serbe dhe Srpska Demokratija nuk arritën të kalojnë fazën e certifikimit, ndërsa një kandidat i PDK-së për kryetar të komunës së Deçanit u refuzua për shkak të përkatësisë së tij në shërbimin e jashtëm, bazuar në informacionin e siguruar nga Ministria e Punëve të Jashtme.
KQZ gjithashtu miratoi vendimin për certifikimin e subjektit “Lidhja e Prishtinës” dhe 56 kandidatëve të saj për Kuvendin Komunal të Prishtinës, në përputhje me vendimin e PZAP-it të datës 18 gusht 2025.
Në të njëjtën mbledhje, KQZ mori edhe një vendim për zëvendësimin e një kandidati nga subjekti “E Vërteta”, duke e decertifikuar një emër dhe miratuar një tjetër në vend të tij.
Zgjedhjet Lokale 2025 pritet të mbahen më 12 tetor dhe përfshijnë zgjedhjen e kryetarëve të 38 komunave si dhe të asambleve komunale. Lista e plotë e subjekteve dhe kandidatëve të certifikuar është publikuar në faqen zyrtare të KQZ-së./lajmi.net/
