Rreth orës 20:30 të së enjtes, në lagjen e Spitalit në Prishtinë, një person i dyshuar ka rënë nga një ndërtesë gjatë përpjekjes për t’iu shmangur arrestimit nga Policia e Kosovës.
Sipas njoftimit zyrtar të Policisë, i dyshuari ishte i kërkuar me urdhër-arrest vendor dhe ndërkombëtar për veprën penale “vrasje e rëndë”. Në momentin kur policia po tentonte ta arrestonte, ai dyshohet se ka rënë nga lartësia, duke pësuar lëndime trupore.
Personit të lënduar i është ofruar menjëherë ndihma mjekësore dhe më pas është transferuar për trajtim të mëtutjeshëm në Qendrën Klinike Universitare të Kosovës (QKUK).
Autoritetet policore kanë bërë të ditur se janë duke ndërmarrë të gjitha veprimet e nevojshme në bashkëpunim me institucionet përkatëse për të sqaruar rrethanat e plota të ngjarjes.
