PDK e LDK po i mbajnë të fshehura listat e kandidatëve për deputetë
Dy koalicionet parazgjedhore kanë vazhduar t’i mbajnë të fshehura listat e kandidatëve për deputetë. Vetëm Vetëvendosje ka publikuar emrat e kandidatëve. Ndërkohë, dy partitë bartëse të koalicioneve, PDK e LDK, kanë thënë se tek të hënën do të bëhen publike se kush dhe si janë renditur për t’u bërë deputet.
Dy partitë kryesore në Kosovë, PDK e LDK, si bartëse të koalicioneve parazgjedhore, kanë refuzuar të publikojnë listat përfundimtare të kandidatëve për deputetë, të dërguara në Komisionin Qendror të Zgjedhjeve për certifikim.
Vetëm Partia e Albin Kurtit, deri tash, ka bërë publike listën finale, të kandidatëve për zgjedhjet e 11 qershorit.
Zyrtarët e PDK’së dhe të LDK’së kanë thënë se vetëm udhëheqësit e partive i kanë listat dhe se gjithçka do të bëhet publike të hënën, kur edhe përfundon afati i fundit për korrigjim e certifikim përfundimtar.
Express ka kontaktuar me disa zyrtarë të PDK’së e LDK’së, por askush s’ka guxuar të japë listën e kandidatëve.
Në PDK kanë thënë se është në dorën e Kadri Veselit se kur do të bëhen publike listat finale.
Lexo edheRaportohet se ka humbur Xhejlane Abdullahu
