Që nga data 7 shtator, në sallat operative të Klinikës së Kirurgjisë të QKUK-së nuk janë kryer operacionet. Kjo për shkak të vdekjeve të dyshimta të tre pacientëve të cilët kanë ndërruar jetë pak më shumë se dy javë më parë në këto salla, shkaku i të cilave dyshohet të jetë gazi oksidul.
Por pas dy javëve mospunë, klinikat e kirurgjisë janë kthyer në gjendje funksionale.
Komisioni Profesional më datë 25 shtator ka marrë vendim që të fillojë me punë në sallat operative.
Në vendimin të cilin e ka siguruar Gazeta Express, komisioni i përbërë nga doktor Nehat Baftiu, Saudin Maliqi, Rifat Bajrami, Rexhep Gjyliqi si dhe Mehdi Krasniqi kanë marrë vendim që të bëhet funksionalizimi i sallave ku do të aplikohen metodat e anestezionit të cilat e përjashtojnë përdorimin e gazit oksidul (N20) duke mundësuar kështu përdorimin e ajrit të komprimuar, i cili është në sistem dhe me të cilin furnizohen Klinika e Kardiokirurgjisë, sallat e Klinikës Emergjente si dhe disa klinika në QKUK.
Ndërkaq, rreptësisht nga ana e këtij komisioni është ndaluar përdorimi i gazit N20.
Tutje në vendim të cilin e ka siguruar Gazeta Express thuhet se Shërbimet Teknike dhe ato të Pajisjeve Mjekësore janë të obliguara që në vazhdimësi të kontrollojnë dhe të mirëmbajnë sistemin sipas detyrave dhe përgjegjësive të sektorëve përkatës.
Organet e hetuesisë si Prokuroria, Policia e në anën tjetër Inspektorati Shëndetësor, janë duke i hetuar shkaqet që kanë çuar në vdekjen e tre pacientëve në QKU më datë 7 shtator të këtij viti. Dyshimet e para bien mbi gazin oksidul (N20), i cili pa licencë adekuate ishte prodhuar në Kosovë.
