Liderët e katër partive më të mëdhaja politike, BDI, PDSH, LSDM dhe OBRM-PDUKM, njiherit edhe nënshkruese të marrëveshjes së Përzhinos do të takohen këtë të mërkure, transmeton Telegrafi Maqedoni.
Në këtë takim do të shqyrtohen të arriturat e deritanishme të zbatimit të Marrëveshjes dhe të arrihet deri te përfundimi nëse janë plotësuar kushtet për zgjedhje, të cilat janë planifikuar të mbahen në dhjetor të këtij viti.
Ekziston optimizmi te pushteti dhe te opozita se reformat janë në zbatim e sipër, që është një tregues se kushtet për zgjedhje do të pranohen. Ndër këto kushte është edhe formimi i Komisionit ad-hoc për mbikëqyrjen e mediave, që është duke punuar në drejtim të përzgjedhjes së kandidatit të pestë, që duhet të jetë i përkatësisë etnike shqiptare.
Përqëndrimi të procesi zgjedhor do ta mënjanojë përqëndrimin e deritanishëm në akuzat e ndërsjella për mosrespektim të marrëveshjes së Përzhinos./Telegrafi/
