Njoftohet se 116 persona, kryesisht të rinj, sot kanë kërkuar ndihmë mjekësore në Spitalin e Mitrovicës, “Dr. Sami Haxhibeqiri”, me simptoma të helmimit.
Në një komunikatë për media nga QKUK, thuhet se zyra e drejtorit të Përgjithshëm e Shërbimit Spitalor Klinik Universitar të Kosovës, (SHSKUK) ka pranuar një informatë nga Spitali i Përgjithshëm i Mitrovicës, “Dr. Sami Haxhibeqiri”, sipas të cilës, sot nga ora 11:30, kanë filluar të paraqiten në shërbimin emergjent të këtij Spitali, disa persona të dyshuar si raste të helmimit e që kanë kërkuar ndihmën mjekësore, raporton Telegrafi.
Nga statistikat zyrtare të Spitalit, rezulton se 116 persona, kryesisht të rinj në moshë, prej tyre edhe nxënës, kanë kërkuar ndihmë mjekësore, me shenja që flasin për një helmim të mundshëm.
Spitali ka angazhuar të gjitha kapacitetet me të gjitha repartet dhe stafin dhe që të gjithëve u është dhënë ndihma mjekësore nga stafi profesional”.
Ndërkohë, nga mjekët kujdestar në Klinikën Infektive, raportohet se 3 raste janë transferuar në këtë Klinikë si raste që kanë pasur nevojë të trajtim të mëtejmë dhe janë jashtë rrezikut.
Shumica e rasteve janë liruar nga Spitali i Mitrovicës, por ka ende pacientë që janë në mjekim e sipër.
SHSKUK, ka angazhuar të gjitha kapacitetet profesionale dhe është i gatshëm të ofrojë kujdesin shëndetësor në rastet që kërkojnë ndihmë mjekësore, thuhet në komunikatën e drejtorit të SHSKUK. /Telegrafi/
