Policia e Kosovës, përmes Sektorit për Hetime Financiare, në bashkëpunim dhe nën autorizimin e Prokurorisë Themelore në Prizren, njofton se ka zhvilluar hetime lidhur me dyshimet për veprime të kundërligjshme në procedurat e prokurimit publik.
Si rezultat i hetimeve, sot është realizuar një kontroll në bazë të urdhëresës së Gjykatës Themelore në Prizren, në disa lokacione të lidhura me rastin. Gjatë kontrollit janë sekuestruar pajisje të ndryshme elektronike dhe dëshmi tjera materiale që mund të shërbejnë në procedurën hetimore.
“Po ashtu, në njërin nga lokacionet është gjetur edhe një armë zjarri me municion, për të cilën është iniciuar rast i veçantë në njësinë policore përkatëse.
Personi i dyshuar është intervistuar në prani të avokatit mbrojtës dhe me vendim të prokurorit kompetent është ndaluar për 48 orë”, thuhet në njoftimin e policisë.
“Policia e Kosovës, në koordinim të plotë me organet e drejtësisë, do të vazhdojë me ndërmarrjen e të gjitha veprimeve të nevojshme ligjore deri në sqarimin e plotë të rastit”, përfundon njoftimi.
