Lideri i LDK’së, Isa Mustafa ka thënë se Ibrahim Rugova ishte lider i epokave derisa ka folur në 11 vjetorin e vdekjes së tij.
Me këtë rast, Mustafa ka thënë se nga ish-Presidenti i Kosovës askush s’kishte dëgjuar asnjë fjalë të keqe prej tij.
“Sot, me pikëllim dhe shumë krenari, në 11 vjetorin e kalimit të tij në amshim, e përkujtojmë Presidentin Historik, Dr. Ibrahim Rugovën. Rugova ishte arkitekt i pavarësisë, lider vizionar, personalitet frymëzues, të cilit s’ia dëgjoi kurrë askush një fjalë të keqe. Gjatë jetës së tij, Rugova na udhëhoqi drejt lirisë, pavarësisë dhe demokracisë, vendosi standardet më të larta në politikë, u bë mik i shquar i botës demokratike, ishte krijues kulminant dhe njeri shembullor…”, ka shkruar Mustafa, në FB teksa ka cituar cilësimet e Senatorit Amerikan, Bob Doll për Rugovën.
“Ashtu si Presidenti Amerikan Abraham Lincoln, Presidenti Rugova është bërë njeri i epokave”, shkruante Senatori Bob Doll.
“Ibrahim Rugova ishte me të vërtetë i tillë: Njeri i Epokave.Lavdi për jetë e mot!”, ka shtuar ai.