Zëdhënësi dhe deputeti i LDK-së, Besian Mustafa ka mbajtur një konferencë për media duke falënderuar të gjithë qytetarët e Kosovës që kanë shfrytëzuar të drejtën e tyre demokratike e kushtetuese për të votuar.
Ai ka thënë se bazuar në të dhënat nga tereni, procesi deri më tani është i rregullt dhe demokratik, për çka i ka falënderuar përsëri qytetarët.
“Shfrytëzoj edhe mundësinë që të ftoj të gjithë qytetarët e Kosovës që ende nuk kanë votuar që ta bëjnë një gjë të tillë sa më parë sidomos para orës 19:00, kur edhe mbyllen qendrat e votimit. Për rezultatet nuk mund të flas tani, për parregullsi përjashto disa raste minore të vogla nuk kemi informacion për parregullsi të mëdha. Qytetarët e Kosovës kanë treguar një vetëdije të lartë, demokratike e kushtetuese duke marrë pjesë edhe në numër të lakmueshëm në këto zgjedhje por edhe duke ndjekur një proces të mirëfilltë zgjedhor. I ftoj të zënë afatin kohor para orës 19:00 të mbrëmjes”, ka thënë Mustafa para mediave. /Lajmi.net/
